भाऊबीज

पाटील परिवारातर्फे सर्व आप्तेष्ट आणि रसिकांना भाऊबीजेच्या हार्दिक शुभेच्छा !

भाऊबीज

कार्तिक शुक्ल द्वितियेला
सण भाऊबीजेचा आला
बहीण ओवाळी बंधूराजाला
टिळा लाविते पंचप्राणाला

आठवता परदेशी बंधू राजाला
बहीण पूजिते बंधु चंदू रायाला
धन्य ही संस्कृती नसे तुलनेला
निसर्गाशी जोडी भाऊबीजेला

यम द्वितीयेचा सण आगळा
भावा बहिणीचा प्रेम सोहळा
पवित्र नात्याचा उत्सव सजला
जणू जीवनी नंदादीप पेटला

भाऊबीज

भाऊ माझा ढगाएव्हढा
जरी सावळा मायेचा ओलावा
बहीण माझी गोरी कण्हेरी
चकाकते विदुयलतेपरी

भाऊ माझा चंद्रासम
बहीण नाजूक चांदणी
ओवाळते भाऊरायास
विशाल या नभांगणी

एकाच मातीची आम्ही बीजे
रुजली जरी वेगवेगळी
अजोड ही प्रीत रुजे
बहिणीची माया आगळी

राजेंद्र देवी