Submitted by 'स्वच्छंदी on 24 August, 2026 - 11:40
काच दंभाची फुटावी लागते
'आपली' किंमत कळावी लागते
येत नाही शक्यतो ओठांवरी
वेदना समजून घ्यावी लागते
'आपले' मानून ना मिळते कुणी
रेघ.....हातावर असावी लागते
नेम जर असला पुढे चुकवायचा
एक मुंगी वाचवावी लागते
भेटते शेरास नंतर वाहवा
जखम आधी खोल व्हावी लागते
टेबलावर काम असते आपले
छान! मग खुर्ची म्हणावी लागते
चालणारे थांबते पाऊलही
साद हृदयातून यावी लागते
माणसाचे मूल्य कळते यारहो!
...एक व्यक्ती दूर जावी लागते
'दगड' ही बनतो जगाची देवता
फक्त त्याची वेळ यावी लागते
: महेश मोरे (स्वच्छंदी)
शब्दखुणा:
Groups audience:
Group content visibility:
Public - accessible to all site users
शेअर करा
येत नाही शक्यतो ओठांवरी
येत नाही शक्यतो ओठांवरी
वेदना समजून घ्यावी लागते
'आपले' मानून ना मिळते कुणी
रेघ.....हातावर असावी लागते
छान आहे गझल. आवडली.
छान
छान