पाककृती स्पर्धा क्र.१: वरणभात सजावट- mi_anu

"नको करायला यावर्षी काही.मस्त मस्त पाककृती आल्यात, बुकमार्क करून ठेवाव्या,करून पहाव्या."
"वेडी आहेस का?यावेळी किमान सोपे पेपर आलेत.पुढच्या वर्षी उकडीचे मोदक, सुरळी वड्या किंवा पुरणमांडे वगैरे आले तर?संधी दारावर परत परत नॉक करत नसते.मायगेट च्या नोटिफिकेशन सारखं तिचं नोटिफिकेशन ती एकदाच देते."

तर मनाचा संवाद संपवून नेहमीप्रमाणे सुट्टीच्या दिवशी दिवसभर लोळून संध्याकाळी तहान लागल्यावर विहीर खणायला घेतली.डोक्यात आईस्क्रीम स्कुप सारखा भात वगैरे कल्पना होत्या पण गिफ्ट सेट मधले बाउल आपण 2 फोडले, 2 ला कडेला पोचे पडले आणि 2 वर पालीचा स्प्रे मारल्याने ते टाकले असं आठवलं आणि मग हातासरशी एका नव्या प्लॅटर ची खरेदी झाली.सजावट कच्चा माल खरेदीला किराणा वाल्याकडे गेल्यावर:
"नाचणी पापड तो कल ही खतम हो गया भाभीसा.त्योहार का दिन है ना."
"ठीक है बटाटा साबुदाणा पापड दो."
"वो अभि नवरात्र मे नया स्टॉक आयेगा.चाहीये तो कल मंगाके देता है, फोन नंबर लिखाके जाव."
"नही ठीक है, कोई बात नाही भैसा, उडद पापड होगा तो वो दे दो और वर्हाडी ठेचा." (आपणही त्या निमित्ताने सभ्यपणे दुकानदाराला भैसा म्हणून मनात 'अरे म्हश्या सगळं कसं संपलेलं असतं तुझ्याकडे अडीच गाळा दुकान असून?तो सेवा ड्रायफ्रुट वाला बघ मोठ्या गल्लीतला.त्याच्याकडे अगदी आगावे सिरप ची बिस्किटं पण मिळतात.' म्हणून व्हेंटून घ्यावं.)

आता मुख्य कृती
1. घरी येऊन बीट पावडर मध्ये 3 पापड भिजवून वाळत घालून इन्स्पेक्टर झेंडे बघायला जावं.
2. आल्यावर कुकर लावून त्या पापडाचे तुकडे कापायला घेऊन सुबक चटई विणावी. आणि मायक्रोव्हेव मध्ये 1.2 मिनिट ठेवावी.
3. छान दिसतेय म्हणून खुश होऊन चटई उचलायला जावी तर ती प्लेट ला चिकटलेली.मग सुरीने सिरीयल किलर सारखे त्याचे तुकडे करून डिश बाजूला ठेवून द्यावी.आणि कपाटातून दुसरी डिश काढावी.
4. आता रंगवायची एनर्जी संपल्याने पांढरी चटई फूड पेपरला तेल लावून प्लेट मध्ये ठेवून 1.2 मिनिट ठेवून द्यावी आणि कुकर बघायला घ्यावा.
5. वरण घट्ट शिजवून बाजूला ठेवावे.
6. श्वास रोखून घाबरत भात वाटीत थापायला घ्यावा.भात हा प्रकार कधीही सैल कधीही घट्ट बनू शकतो.तो कमीत कमी चमचा वापरून थापून थोडा वेळ फ्रिजमध्ये ठेवावा.
7. आता पापडाचा द्रोण करायला घ्यावा. हा द्रोण सुटतो. पण हे बग फिचर म्हणून वापरून थेंबाचा आकार बनवावा.
8. अर्धाच उरलेला उकडलेला बटाटा सत्कारणी लावून बटाटा, दही,जिरा पावडर, चाट मसाला, मीठ असे रायते बनवावे.
9. कढल्यात मोहरी हिंग फोडणी करून त्यात टोमॅटो परतावे.त्यात भरपूर klm(म्हणजे कांदा लसूण मसाला) टाकून थोडे तापवावे.
10. आता त्या मोला महागाच्या प्लॅटर मध्ये(आयकिया वर 4 दिवस आधी काळी प्लेट मागवून स्वस्त पडली असती पण अजिबात म्हणजे अजिबात विचारच करायचा नाही.आली लहर केला कहर.) भातरुपी वाटी, त्यात घट्ट वरण, वर टोमॅटो klm फोडणी घालावी.द्रोणात बटाटा रायते घालावे.लेसन लर्नट असलेली पांढरी चटई अंथरुन तिचे आयुष्य पावन करावे.
11. आपल्याकडे चांगली पांढरी बॅकग्राऊंड नाही याचा साक्षात्कार होऊन एक बेबी ब्लॅंकेट त्या प्लॅटर खाली वापरावे.वेळेला केळे.
12. भरपूर फोटो काढावे.
13. आता स्टेप क्र.3 मध्ये कापड चिकटून बाजूला ठेवलेली प्लेट घेऊन त्यात वरणभात कालवावा आणि सर्व डेकोरेशन साहित्य चुरून मिक्स करावे.
14. खाणं झाल्याशिवाय लेख अजिबात लिहू नये.

यानंतर 'आता शिरा स्पर्धा करूया का' असे साहसी विचार मनात येतील ते दाबावे.आपले शिरा स्किल शिरा करताना खीर होणे, जास्त परतले जाणे, मोकळा न होणे या लेव्हल चे माशाल्लाह आहेत याची विनम्र जाणीव ठेवून शांत झोपायला जावे.

मोरया!!!