मायबोलीचे मोबाईल अॅप (अँड्रोईड + आयओएस) सर्वांसाठी उपलब्ध आहे.
श्रावणसरी
Submitted by दत्तात्रय साळुंके on 23 August, 2019 - 06:40
श्रावणसरी
असा हिंदोळला श्रावण
त्याच्या धारा रुपेरी
झुला झुलती झाडाला
उभार सरीवर सरी
चिंब न्हाले डोंगर
रानफुले कडेवर
हरवली पायवाट
जड झाला गंधभार
ओलेत्या हिरवाईला
नक्षी गढूळल्या रेषा
धुंधावले रान सारं
वारा प्यायल्या दिशा
अलगद निसटले
सुवर्णकण मेघातून
नाच-या थेंबावर
मोरपंखी पखरण
सरी श्रावण अशा
माहेरवाशीणी आल्या
नागपंचमी खेळूनीया
नांदायला घरी गेल्या
© दत्तात्रय साळुंके
३-८-२०१९
विषय:
शब्दखुणा:
