शशक स्पर्धा - Abuva - पोकळी

"लय झालं, जीवच देतो आता" राजा बोलला.
"तुज्यायला..." हे अचानक पुढे सरसावले.
"अवो नाय वो, नकोऽ"
राजा दोन‌ पावलं मागे सरला, अगदी कड्याच्या काठावर...
"मागे नोको रेऽऽ राजा..."
ह्यांच्या हातात त्याचा हात आला.
पण त्यानं झिडकारला.
"पाय बगा हो..."
झटापटीत त्याचा तोल गेला.
पकडायला गेला तर‌ यांचा शर्ट हाती लागला.
"आयेऽऽ"
"राजाऽऽ"
क्षणभरच नजर भिडली. भयभीत. मरणासन्न.
हात गळ्याशी धरून मी धावू लागले.
कड्याखाली तो दिसेनासा झाला.
जाताना ह्यांना घेऊन गेला.
"वाचव गं मायेऽऽ"
एक किंकाळी अवकाश चिरत गेली.
"अवो, अवोऽऽ"
पायाखाली जमीन सरली.
हाताच्या झटक्यात कड्यावर काळे मणी उधळले.
मी‌ त्या पोकळीत सामावून गेले.

(करुण-अनलंकृत)