शशक स्पर्धा – जाई. - ८० ची महागडी फॅशन (हास्य रस /रूपक अलंकार)

सोशल मीडियावर ८०च्या दशकाची फॅशन आली. तसे तिनेही रीतसर प्रॉम्प्ट देऊन मनजोगता फोटो आल्यावर तो फेसबुकवर टाकला. तिथल्या कॉमेंट्स आणि लाईकच्या वर्षावात चिंब भिजून ती सुखावली.

पब्लिक सेटिंग फोटो ठेवल्याने दूर राजस्थानमध्ये बसलेल्या रिटायर्ड लालाजींनी देखील तो फोटो पाहिला. बघताक्षणीच काही वर्षापूर्वी घडलेल्या घटनेच्या स्मृती त्यांच्या मनात जाग्या झाल्या आणि त्यांच्या हाताची बोटे फोनवर जुना मित्र कोठारेंचा नंबर शोधू लागली.

इतकी वर्ष ओळख लपवून निवांत जगताना साठीत गुन्हा उघडकीला आला याच तिला आश्चर्यमिश्रित वैषम्य वाटलं. बाईसाच्या चोरलेल्या दागिन्यांचा ठाव ठिकाण पोलिसांना सांगत असतानाच न राहवून तिने पोलीस अधीक्षक महेश कोठारेना "इतक्या वर्षांनी कसे ओळखलेत"अशी विचारणा केलीच.

कोठारे हसत म्हणाले “मॅडम, ८०ची फॅशन तुमचा गुन्हाही सोबत घेऊन आली”