पाककृती स्पर्धा क्रमांक ३ - चवींचा त्रिवेणी संगम -जास्वंद डाळिंब ज्युस - मनीमोहोर

जास्वंद डाळिंब ज्युस

हा पाककृती स्पर्धेचा इशय लई हार्ड हाय. . पण असो. एकदा भाग घ्यायचा म्हटलं की काहीतरी करावं लागतच. वाचता क्षणी एकमेव मनात आला तो गोकर्णीचा चहा . पण मीच तो धागा काढलेला असल्याने आणि दोन तीन वर्षांपूर्वी एका गणेशोत्सवात ही तोच रिपीट झाल्याने तो बाद करावा लागला.

हल्ली जास्वंद म्हणजे जपा कुसुम किंवा हिब्सकस हर्ब म्हणून इन आहे. नशिबाने टीचभर गॅलरीतल्या बागेत फुलतं झाड ही आहे जास्वंदीच. त्यामुळे ते वापरून काहीतरी करायचं ठरवलं. त्या लाल रंगाला पूरक म्हणून डाळिंब निवडलं आणि हे जास्वंद डाळिंब सरबत तयार केलं. दोन्हीची आद्याक्षरं घेऊन नाव देणार होते पण नाव वाचून लोक पाकृ न वाचताच पळून जातील म्हणून ते बाद केलं. तर आता प्रत्यक्ष पाककृतीकडे वळू या.
साहित्य
जास्वंदीची फुले, डाळिंबाचे दाणे, मीठ ,मिरपूड

कृती
जास्वंद फुलाच्या पाकळ्या पाण्यात उकळत ठेवल्या. फुल गुलाबी रंगाचं होतं पण उकळल्यावर त्याला तो रंग न येता काळपट/ करडा रंग आला. रंग बघून निराशच झाले कारण मस्त गुलाबी रंग येईल असं वाटलं होतं. असो. डाळिंब मात्र चांगलं लाल होतं . त्याचा मिक्सर मध्ये न घालता रस काढून तो गाळून घेतला. त्यात जास्वंद अर्क घातला . तो काळपट रंग ओव्हर पॉवर न होता मस्त लाल रंग आला त्यामुळे छान वाटलं. मग त्यात चवीप्रमाणे पाणी,मीठ, मिरपूड घातली आणि तयार झाला जास्वंद डाळिंब ज्युस. थोडावेळ फ्रिज मध्ये ठेवला आणि मग मीच प्यायला.

अधिक टिपा

१) रंग छान आला होता पण आम्हा कोकणातल्या लोकांना लाल बुंद कोकम सरबत पाहायची सवय असल्याने फार काही ग्रेट वाटलं नाही. जास्वंदीचा काळपट नाही आला हे मात्र ग्रेट वाटलं.
२) चव जास्वंदीची लागत नव्हती फार . डाळिंब सरबत प्यायल्या सारखच लागत होतं
३) दोनच फुलं असल्याने एक सजावटी साठी ठेवलं आणि एक वापरलं त्यामुळे एकच ग्लास झाला. त्यावर “ हा रस प्यायच्या शिक्षेतून मी वाचलो “ ही मुलाची प्रतिक्रिया.
४) घरात हिरव्या माठाची देठी होती ती आणि डाळिंबाचे दाणे वापरून सजावट केली. मजा आली.
५) ह्यात साखर, पुदिना वगैरे ही घालू शकता.