फुललेला कांचन

फुललेला कांचन

ठाण्याचा गावदेवी भाग स्टेशनच्या जवळ असल्याने कायम गजबजलेला, गाड्या, बसेस रिक्षा, यांचे आवाज, त्यांचे वाजणारे हॉर्न, धुळीचे प्रमाण साधा श्वास घेताना ही जाणवेल इतके जास्त , कायम ट्रॅफिक जॅम, सिग्नल चा पत्ता नाही त्यामुळे जीव मुठीत धरून चालणारी माणसं, तिथेच ठाण मांडून धंदा करणारे फेरीवाले, वाहतुकीच्या नियमांचा कायमच बोजवारा उडवणारे पादचारी आणि वाहनचालक, , रस्त्यावरच टपऱ्या , त्यांचा कचरा , त्यांचं सांडपाणी, रस्त्यावर टाकलेल्या पानाच्या पिचकाऱ्या वगैरे वगैरे..

वरच वर्णन वाचून नवख्याना त्या भागाची थोडी कल्पना येईल . प्रतिकुल परिस्थितीत निसर्ग चक्र चालूच राहत. तो फुलतो, बहरतो. त्यामुळे सभोवती असं वातावरण असताना ही तिथला एक कांचन नखशिखान्त फुलला आहे. असंख्य गुलाबी फुलं आणि हिरवीगार पानं ह्यामुळे देखणा दिसणाऱ्या त्या कांचन वृक्षाला दुर्लक्षून पुढे जाणं अशक्यच आहे.क्वचित कधी कुरूपतेतही सौंदर्य जन्माला येतं ते असं. त्याच्या फुलण्याचं , बहरण्याचं कौतुक केल्याशिवाय पुढे जाताच आलं नाही मला. पाच मिनिटं थांबून मन भरेपर्यंत कौतुकाने त्याला न्याहाळत राहिले. नजरेनेच त्याला कुरवाळलं आणि मग फोटो ही काढला.
ठाण्यात जे राहत आहेत त्यांनी शक्य झालं तर गावदेवी बसस्टॉप च्या समोरचा तो कांचन अवश्य बघून यावं. तसेच आपण अनुभवलेले असे क्षण ही इथे लिहा.