शशक १ - गणेश चतुर्थी - अतुल

"गणपतीची आरास कशी केलीयेस यावर्षी?" तिने काहीतरी विचारायचे म्हणून विचारले.
तसे आता त्या दोघांच्यात काही राहिले नव्हतेच. पण बऱ्याच वर्षांनी अनायासे भेटले म्हणून ते कॉफी घेत बसले होते.

"नाही बसवत मी गणपती आता" तो निर्विकारपणे म्हणाला.

"का?"

"या उत्सवातून जे शिकायचंय ते शिकून झालंय माझं कधीच. मूर्तीची प्रतिष्ठापना, मनोभावे पूजाअर्चा. आणि अखेर तिचं विसर्जन. जसा जीव लावायचा तसंच सोडूनही द्यायचं. हीच शिकवण..."

"बरं मग?"

"नेहा" तो म्हणाला, "तू आयुष्यातून गेलीस तेंव्हाच या गोष्टी शिकलोय गं मी..."

ते ऐकले आणि तिने विस्मयचकीत नजरेने त्याच्याकडे बघितले! तो शांतपणे उठला. निघून गेला.

कॉफीचा कप हातात धरून ती बराच वेळ तिथे एकटीच बसून राहिली.