आलीच आहेस तर...

Submitted by पॅडी on 5 April, 2024 - 01:03

आलीच आहेस भेटीला तर
आरामात; नीट टेकून बस
टणकाय दोघांमधील माती
तरी टिकवून आहे कस ...

मोकळी ढाकळी देहबोली
शब्दांना अंगांग सैलावू दे
खळाळत्या शुभ्र हास्याला
थोडे पात्राबाहेर फैलावू दे...

रुचेल न रुचेल; भीतीपोटी
दाबू नकोच आतले कढ
उधळ बंधार्‍यांचे मनसुबे
जरा हमसून हमसून रड...

कशाला उगाच त्रास म्हणून
नाकारू नकोस वाफाळता चहा
मनावरचे मळभ दूर सारून
एकदा माझ्या आरपार पहा...

सावध; सजग जगण्याचा दंभ
क्षणभरासाठी सोडून देऊ
हातात हात घेऊन ; परत -
टिपूर चांदण्यात फिरून येऊ...

***

विषय: 
काव्यलेखन
शब्दखुणा: 
कविता
काव्य
Groups audience: 
गुलमोहर - कविता
Group content visibility: 
Public - accessible to all site users
शेअर करा

वाह..
(बंधारा, पात्र या शब्दांमुळे नदी वगैरे सुरुवातीला वाटलं होतं)

Submitted by अ'निरु'द्ध on 6 April, 2024 - 02:22

मस्तच

Submitted by पुरंदरे शशांक on 15 April, 2024 - 01:22

टणकाय म्हणजे काय ?

फ्लो मस्त आहे कवितेचा. मंचीय कविता म्हणून वाचन सुरेख होईल.
सौमित्रच्या शैलीत वाचून पाहिली..

Submitted by रघू आचार्य on 15 April, 2024 - 10:20

>>> टणकाय म्हणजे काय ? टणक आहे. ( जसे : माहिताय - माहीत आहे ? )

>>>>>> फ्लो मस्त आहे कवितेचा. मंचीय कविता म्हणून वाचन सुरेख होईल.
सौमित्रच्या शैलीत वाचून पाहिली..
रघू आचार्य - मन:पूर्वक आभार..धन्यवाद Thanks for the appreciation...

Submitted by पॅडी on 15 April, 2024 - 23:46

छान!

टणकाय दोघांमधील माती
तरी टिकवून आहे कस ...

खळाळत्या शुभ्र हास्याला
थोडे पात्राबाहेर फैलावू दे.

विशेष आवडल्या

Submitted by छन्दिफन्दि on 27 April, 2024 - 13:16

वा वा! खूपच सुंदर जमलीय,
"रुचेल न रुचेल... हमसून रड..." >> हे तर छानच,

सौमित्रच्या शैलीत वाचून पाहिली..>> correct, मी पण... Happy
टणकाय माती नाही कळलं

Submitted by @गौरी on 29 April, 2024 - 02:26

@गौरी जी- खूप खूप आभार प्रतिसादासाठी..!

>>> टणकाय म्हणजे काय ? टणक आहे. ( जसे : माहिताय - माहीत आहे ? )

Submitted by पॅडी on 29 April, 2024 - 06:15