शशक स्पर्धा – अनिंद्य - भीती

सभा जिंकणारा वक्ता म्हणून प्रसिद्धच होता तो. मंच, माईक आणि समोर श्रोते हे एकदा जमून आले की त्याच्या जिभेवर सरस्वती- शारदा- वाग्देवी गरबा खेळत, झिम्मा फुगडी घालत, ब्रेकडान्स करत. विषय कोणताही असो - राजकारण, समाजकारण, जीवनाचे तत्वज्ञान, काहीही.

अशाच एका कार्यक्रमात तो सुसाट सुटला होता.... आपल्याला आपल्या मनासारखे जगता येत नाही याचे सर्वात मोठे कारण आहे भीती. लहानपणी आईबाबा रागावतील ही भीती, शाळेत शिक्षकांची, नोकरी करतांना बॉसची आणि वय झालं की यमाची, मृत्यूची... भीती आपल्याला मनासारखे करू देत नाही.

एका श्रोत्यानी आठवण करून दिली

- तुम्ही एक विसरलात. बायकोची भीती.

- विसरलो नाही मित्रा, मुद्दाम नाही बोललो. बायको सभेला आली आहे.

शब्दसंख्या - १०० (शीर्षक वगळून)
रस - तुम्हीच ठरवा
अलंकार - तुम्हीच ठरवा