जिन्नस एक, पदार्थ अनेक - अल्पना - राजगिरा ब्रेकफास्ट प्लॅटर

जिन्नस एक पदार्थ अनेक स्पर्धेत मला भाग घेता येईल असं वाटलं नव्हतं. एखादा पदार्थ करणं तसं सोप्पं असतं. पण एकाच जिन्नसाचे ३-४ पदार्थ करणं म्हणजे स्वयंपाकघरात बराच वेळ घालवावा लागणार. पण काल मैत्रिणीशी बोलताना हे ब्रेकफास्ट प्लॅटर सुचलं. पदार्थ जरी मी केले असले तरी या प्लॅटरची मुळ कल्पना माझी दिल्लीतली मैत्रिण प्राजक्ता हिची आहे. मी दिल्लीत असते तर पदार्थ पण तिनेच केले असते कदाचित.

तर या स्पर्धेसाठी आमचा जिन्नस आहे राजगिरा. राजगिर्‍याचा वापर करून मी हे उपवासाला चालणारे ब्रेकफास्ट प्लॅटर बनवलं आहे. राजगिरा हा मुख्य घटक वापरून राजगिर्‍याच्या लाह्यांचा ग्रॅनोला, राजगिरा लाह्या आणि सफरचंद वापरून स्मुदी आणि राजगिर्‍याच्या पिठाचे पॅनकेक्स असे तिन पदार्थ या थाळीमध्ये आहेत. स्मुदी आणि गॅनोला हे दोन्ही पदार्थ गोड असल्याने मग नाश्त्यामध्ये जरा तिखटाचे काहीतरी करावे म्हणून पॅनकेक गोड न करता थोडे तिखट केले आहेत.

राजगिरा प्लॅटर मधल्या पदार्थांच्या पाककृती
१.राजगिरा लाह्यांचा ग्रॅनोला -
साहित्य - दोन वाट्या राजगिर्‍याच्या लाह्या, अर्धी वाटी मखाने,अर्धी वाटी काजू आणि अक्रोड, थोड्या भोपळ्याच्या बिया, थोडे मनुके, ३-४ चमचे गुळाची पावडर / पंजाबी शक्कर (साखरही चालेल), थोडे तुप
कृती -
राजगिर्‍याच्या लाह्या थोड्या भाजून घेतल्या. थोड्या तुपावर मखाने व्यवस्थित भाजून घेतले. मखान्यांचे थोडे तुकडे केले. थोड्याश्या तुपावर काजु, अक्रोड आणी भोपळ्याच्या बिया भाजून घेतल्या. हे सगळं साहित्य एका टोपळ्यात मिक्स केलं. एका पॅनमध्ये थोड्याश्या तुपावर पंजाबी शक्कर गरम करायला ठेवली. ती शक्कर भिजेल इतपत पाणी घालून त्याचे कॅरमल केलं. ते जरा जास्त घट्ट वाटलं म्हणून त्यात थोडं अजून पाणी घालून उकळू दिलं. हे कॅरमल तोपल्यातल्या लाह्या आणि ड्रायफ्रूट्सवर घालून मिक्स केलं. त्यात थोड्या मनुका घातल्या. थंड झाल्यावर हाताने त्या सगळ्याचे थोडे तुकडे केले.
२. राजगिरा लाह्या आणि सफरचंदाची स्मुदी

साहित्य - एक सफरचंद, दिड - दोन ग्लास दुध, थोडी दालचिनी पुड, चवीपुरता मध आणि वाटीभर राजगिर्‍याच्या लाह्या
कृती -मिक्सरमध्ये सोललेल्या सफरचंदाचे तुकडे, दालचिनी पुड आणि दुध घालून स्मुदी बनवली. त्यात चवीसाठी थोडा मध घातला. ग्लासमध्ये ही स्मुदी काढून त्यात वरून राजगिर्‍याच्या लाह्या घातल्या.
३. राजगिर्‍याच्या पिठाचे तिखट पॅनकेक

साहित्य - एक वाटी दही, राजगिर्‍याचे पिठ, हिरवी मिरची, जीरेपुड, मीठ आणि चिमुटभर बेकिंग पावडर, तुप, पनीर चे तुकडे
कृती - एका भांड्यात दही फेटून घेतलं. त्यात बारिक चिरून हिरवी मिरची, थोडी जीरेपुड आणि चवीप्रमाणे मीठ घातलं. यात मावेल इतकं राजगिरा पिठ घातलं. नेहेमीच्या पॅनकेक पेक्षा किंचित घट्ट ठेवावं लागलं पिठ नीट पॅनकेक जमण्यासाठी. या पिठात चिमुटभर बेकिंग पावडर घालून व्यवस्थित मिक्स केलं. २ मिनिटांनी गरम तव्यावर तुपावर पॅनकेक घातले. त्यावर झाकण ठेवून वरचा भाग शिजत आला कि त्यांना उलटवून दुसर्‍या बाजूने सुद्धा भाजून घेतलं.
सर्व्ह करताना त्यावर थोडे पनीरचे तुकडे घालून सर्व्ह केलं.
अधिक टिपा - नेहेमीच्या पॅनकेक पेक्षा हे पॅनकेक जरा नाजुक होतात. उलटताना हलक्या हाताने उलटावे लागले. यावर आम्हाला खरं तर रंगासाठी रंगित भोपळ्या मिरच्या पण ठेवायच्या होत्या पनीरसोबत. पण आज माझ्या एका बहिणीचा उपास होता आणि तिच्यासाठी हा ब्रेकफास्ट केला होता म्हणून दुसरं काही घातलं नाही. लाल भोपळ्याचे ओव्हनमध्ये ग्रील केलेले तुकडे किंवा रताळ्याचे तुकडे उपासाला चालले असते पण ते घरी नव्हते. यासोबत ओल्या नारळाची चटणी पण चालेल.

हे प्लॅटर सकाळच्या नाश्त्याला व्यवस्थित पोटभरीचे होते. एकच पॅनकेक, थोडा ग्रॅनोला आणी अर्धा ग्लास स्मुदी प्यायल्यानंतर मला दुपारच्या जेवायच्या वेळी अजिबात भुक लागली नव्हती.