वारी

Submitted by दत्तात्रय साळुंके on 29 July, 2026 - 09:45

ऊन पावसात | चालली ही वारी
पायाला भिंगरी | पथावरी ||१||

जेवता विठ्ठल | विठ्ठल चालता
बैसता, उठता | हाची नेम ||२||

देहभान सारे | विरोनिया गेले
चित्त स्थिरावले | पांडुरंगी ||३||

उशीर अंमळ | झाला संतजना
विठ्ठला सोसेना | विट पायी ||४||

सोडूनी राऊळा | वाटेवर आला
संतांचा जाहला | जगजेठी ||५||

संताचे सांगाती | पांडुरंग दंग
गातसे अभंग | आपुलाची ||६||

येताची पंढरी | सावरला हरी
उभा विटेवरी | गाभा-यात| |७||

दिंड्या पतांकांचे | दळ हे साजिरे
वसिले भिवरे | वैकुंठची ||८||

भेटता सगुण | वारकरी तल्लीन
फळा आले पुण्य | जन्मांतरी ||९||

पाय परतोनी | न फिरे माघारी
सोडूनी पंढरी | जावयासी ||१०||

देतो उपदेश | पांडुरंग नीका
कर्मयोग ऐका | गितेतला ||११||

सुधीर होऊनी | रणांगणा ध्यावे
आयुष्य वेचावे | पुरुषार्थी ||१२||

© दत्तात्रय साळुंके

विषय: 
काव्यलेखन
शब्दखुणा: 
वारी
Groups audience: 
गुलमोहर - कविता
Group content visibility: 
Public - accessible to all site users
शेअर करा