एक चिमणी अबोल झालेली

एक चिमणी अबोल झालेली... पाहताना .. घडून गेलेले
एक चिमणा उडून गेलेला... एक घरटे पडून गेलेले

आजही कालचाच आहे मी... हाच मोठा बदल म्हणावा का?
की बदललेत लोक आता ते... कालवर आवडून गेलेले

शांतता लाभते हवी तेव्हा... फक्त फोटो बघून बापाचा
आमची सावली अमर आहे... झाड असुदे झडून गेलेले

एक घर शिफ्ट होत असताना... एकजण लांबुनी बघत होता
कोरडे ठण्ण राहिले डोळे... आणि मन भडभडून गेलेले

वेगळी वाहवा मला मिळते... जी तुम्हाला दिसायची नाही
जाहले बादशाह गझलेचे, लोक माझ्याकडून गेलेले
=====

-'बेफिकीर'!