गर्जा महाराष्ट्र माझा!

आज महाराष्ट्र दिन.
महाराष्ट्र राज्य स्थापनेचा वर्धापनदिन.

१ मे १९६० या महाराष्ट्र स्थापना दिनासंबंधीची ही चित्रफीत

जय जय महाराष्ट्र माझा या गीताला नुकतंच राज्यगीत घोषित करण्यात आलं.

जय जय महाराष्ट्र माझा गर्जा महाराष्ट्र माझा

रेवा वरदा कृष्ण कोयना भद्रा गोदावरी
एकपणाचे भरती पाणी मातीच्या घागरी
भीमथडीच्या तट्टांना या
यमुनेचे पाणी पाजा
जय महाराष्ट्र माझा

भीती न आम्हां तुझी मुळीही गडगडणार्‍या नभा
अस्मानाच्या सुलतानीला जबाब देती जिभा
सह्याद्रीचा सिंह गर्जतो शिवशंभुराजा
दरीदरीतून नाद गुंजला महाराष्ट्र माझा

काळ्या छातीवरती कोरली अभिमानाची लेणी
पोलादी मनगटे खेळती खेळ जीवघेणी
दारिद्र्याच्या उन्हात शिजला
निढळाच्या घामाने भिजला
देशगौरवासाठी झिजला
दिल्लीचेही तख्त राखितो महाराष्ट्र माझा
जय जय महाराष्ट्र माझा!

गीत - राजा बढे संगीत - श्रीनिवास खळे गायक - शाहीर साबळे.

महाराष्ट्राची थोरवी गाणारी आणखीही महाराष्ट्र गीते आहेत.

महाराष्ट्र जय महाराष्ट्र जय जय जय राष्ट्र महान
महाराष्ट्र जय महाराष्ट्र जय जय जय राष्ट्र महान

कोटि कोटि प्राणांत उसळतो एक तुझा अभिमान
महाराष्ट्र जय महाराष्ट्र जय माझे राष्ट्र महान

बलिदाने इतिहास रंगला तुझाच पानोपान
तूच ठेविले स्वातंत्र्याचे फडकत उंच निशाण
तू संतांची मतिमंतांची बलवंतांची खाण
तूच ठेविला कर्मयोगमय जागृत यज्ञ महान
महाराष्ट्र जय महाराष्ट्र जय माझे राष्ट्र महान

मातीच्या चित्रात ओतिले विजयवंत तू प्राण
मराठमोळी वाणी वर्णी वेदांताचे ज्ञान
पंढरीत नांदले अखंडित भक्तीचे जयगान
ब्रीद न तुटले झुंजाराचे रणी होता निर्वाण
महाराष्ट्र जय महाराष्ट्र जय माझे राष्ट्र महान

वज्रापुढती अभंग ठरले तुझेच ना पाषाण
काळालाही जिंकून गेले इथले प्रज्ञावान
मानवतेचे समतेचे तू एकच आशास्थान
पराक्रमावर तुझ्या विसंबे अखंड हिंदुस्थान
महाराष्ट्र जय महाराष्ट्र जय माझे राष्ट्र महान

गीत - चकोर आजगावकर संगीत - श्रीनिवास खळे गायक - शाहीर साबळे

संयुक्त महाराष्ट्राचा पोवाडा

जय महाराष्ट्र

हे बोल मराठी खेळती ज्यांच्या ओठी
ते सर्व मराठे आम्ही साडेपाच कोटी
ऐक्याची शपथ घेऊया काय मग खोटी
दावुनी कधी काळीचे | दैन्य भाळीचे| दिस सोन्याचे | भविष्यापोटी

राज्य मराठी नागपुराहून गोव्यापर्यंत
पैठण इकडे पसरे तिकडे दर्या अपरांत
तापी वरदा वाहती झुळझुळ तशी वैनगंगा
गोदा भीमा कृष्णा आणिती जीवन रसरंगा

हा दगड फुलांचा मर्द मराठी देश
कणी कोंडा खाया, अंगी फाटका वेश
परि नसानसांतून संचरतो आवेश
स्वातंत्र्यदेवीचे भक्त | उसळते रक्त | इमानी सक्त | साक्ष परमेश

परिमळामाजी कस्तुरी | फुलांत फूल मोगरी
ये मरा ठीचिये घरीव| विद्येचा सुकाळू करी| ती अद्भुत ज्ञानेश्वरी
तुकोबाची भावपंढरी | इथे कडेकपारीमधुन घुमली शाहिरी

भाषा जहाल चिपळूणकरी | केशवसुत देती ललकारी |गर्जती टिळक केसरी
हरिभाऊंची कादंबरी | जोतिबा जळती अंतरी | अण्णांची नाट्यचातुरी |
देवलांची कोणाला सरी | पुढे कोल्हटकर गडकरी |
पठ्ठे बापुराव फडकरी | शाहीर हैदर लहरी |
बालकवी निर्झरापरी | केळकरी नर्मचातुरी|
सानेगुरुजी भावनिर्झरी | तांब्यांची गोड ललकारी|

या मराठीच्या मंदिरी | आसनावरी थोर कितीतरी | शारदापुत्र कीर्तिवंत |
कवी कथाकार कलावंत | किती शाहीर किती संत|

अजिंठ्याची कला काय खुले | नागपुरात वैभव झुले
कोरड्यात कपासी उले | कृष्णाकिनारी शाळू डुले
कोकणची फळे अन फुले | मुंबईला बघुन मन भुले
जय महाराष्ट्र गर्जती धरतीची मुले

मराठ्यांची परंपरा तेजस्वी जाणा | जरा मनात आणा | त्यांचा त्यागाचा बाणा | नाही भ्याले मरणा
शिवराय बाजी तानाजी | ते धनाजी नि संताजी | पेशवाई पहिला बाजी| अभिमन्यूपरी जनकोजी|
राघो भरारी नि महादजी| महादजी हो गोखला बापू रणगाजी

सत्तावन सालचे बंड | पेटले चंड | राहु काय थंड | ठोकुनी दंड |
मराठे प्राण देती समरात | मर्दानी झाशीवाली हो त्यात |सायबानं हाय खाल्ली चित्तात |

आम्ही नेक मराठे हिंदभूमीचे पुत्र |आम्ही पूज्य मानतो एकच हिंदी छत्र
आमुचे आम्हांला घर राहु दे मात्र
ही एक आमुची आस | एक हा ध्यास| याच घोषास | करू सर्वत्र|

सह्याद्रीचे पिउनी वारे कृष्णेचे पाणी | वीर मराठे स्वातंत्र्याची गाती जयगाणी |
तो प्राण पाखडी वासुदेव बळवंत
चाफेकर फासावर गेले झाले यशवंत
सावरकर जन्मठेपेत अंदमानात
सात वर्ष सजा टिळकांना ब्रह्मदेशात
राजगुरू भगतसिंगाचा छावा स्वर्गात
शिरोड्याला रंगले मीठ मर्द रक्तात
बाबू गेनू शूर वीरांची मरणावर मात
क्रांतीवीर कर्मवीरांचा आमुचा प्रांत
परमीवर चक्र राण्यांना पहिले देशात
तो मराठभूचा पुत्र विनोबा संत

या हो सान थोर कुलवंत | कवी कलावंत | संसारी वा संत |
जय जय महाराष्ट्र बोला | बोला एकस्वरी बोला|
घोष तो भिडवू गगनाला

गीत - वसंत बापट. संगीत व गायक स्वर - शाहीर पिराजी सरनाईक

बहु असोत सुंदर संपन्न की महा ।

प्रिय अमुचा एक महाराष्ट्र देश हा ॥ धृ ॥

गगनभेदि गिरिविण अणु नच जिथे उणे
आकांक्षापुढति जिथे गगन ठेंगणे
अटकेवर जेथले तुरंगी जल पिणे
तेथ अडे काय जलाशय नदाविणे
पौरुषासि अटक गमे जेथ दुःसहा ॥ १ ॥

प्रासाद कशास जेथ हृदयमंदिरें
सद्‍भावांचीच भव्य दिव्य आगरें
रत्‍नां वा मौक्तिकांहि मूल्य मुळी नुरे
रमणीची कूस जिथे नृमणिखनि ठरे
शुद्ध तिचे शीलहि उजळवि गृहा गृहा ॥ २ ॥

नग्‍न खड्ग करिं, उघडे बघुनि मावळे
चतुरंग चमूचेही शौर्य मावळे
दौडत चहुकडुनि जवें स्वार जेथले
भासत शतगुणित जरी असति एकले
यन्‍नामा परिसुनि रिपु शमितबल अहा ॥ ३ ॥

विक्रम वैराग्य एक जागि नांदती
जरी पटका भगवा झेंडाहि डोलती
धर्म-राजकारण समवेत चालती
शक्तियुक्ति एकवटुनि कार्य साधिती
पसरे यत्कीर्ति अशी विस्मयावहा ॥ ४ ॥

गीत मराठ्यांचे श्रवणीं मुखीं असो
स्फूर्ति दीप्‍ति धृतिहि जेथ अंतरी ठसो
वचनिं लेखनींहि मराठी गिरा दिसो
सतत महाराष्ट्रधर्म मर्म मनिं वसो
देह पडो तत्कारणि ही असे स्पृहा॥ ५ ॥

गीत -श्रीपाद कृष्ण कोल्हट्कर. संगीत - शंकरराव व्यास . गायक स्वर - स्नेहल भाटकर, ज्योत्स्ना भोळे

महाराष्ट्र देशा

मंगल देशा! पवित्र देशा! महाराष्ट्र देशा!
प्रणाम घ्यावा माझा हा, श्रीमहाराष्ट्र देशा ।।धृ.।।

राकट देशा, कणखर देशा, दगडांच्या देशा।
नाजुक देशा, कोमल देशा, फुलांच्याहि देशा।।

अंजनकांचनकरवंदीच्या काटेरी देशा।
बकुलफुलांच्या, प्राजक्तीच्या दळदारी देशा।।

भावभक्तिच्या देशा, आणिक बुद्धीच्या देशा।
शाहीरांच्या देशा, कर्त्या मर्दाच्या देशा।

ध्येय जे तुझ्या अंतरी, निशाणावरी नाचते करी।।
जोडी इहपरलोकांसी व्यवहारापरमार्थासी
वैभवासी वैराग्यासी।।
जरिपटक्यासह भगव्या झेंडाच्या एकचि देशा

गीत = गोविंदाग्रज . संगीत - गंधार स्वर- मिथिला पालकर, गंधार

जय महाराष्ट्र!