अजून सारे तसेच आहे.....

अजून सारे तसेच आहे
खट्याळ तारे, मधाळ वारे
तुझ्या घरावर स्थिरावलेले
जुनेच काही फिके इशारे

अजून आहे ओळ गुलाबी
तुझ्या वहीतुन तुला दिलेली
अशी कशी ही खुळी अवस्था
नदीच जेथे तहानलेली

सताड उघड्या अबोल नैनी
अजून आहे किनार ओली
कळेल केव्हा तुझ्या मनाला
रित्या मनाची अगाध खोली

जगावयाला तसे पुरे मज
तुझ्या स्मृतीचे सवाल काही
काव्य लिहाया कधी सुचावे
सुरात त्यातिल खयाल काही

तिथेच बहुधा कवित्व येते
अपूर्ण असते जिथे कहाणी
लिहून जातो कधी कवी तो
अस्तित्वाची ज्वलंत गाणी

- किरण कुमार