बेपत्ता बायको, आरोपी नवरा आणि शून्य खून-पुरावा !

15 डिसेंबर 2020 . . .
जगभरात कोविड-19ने थैमान घातलेले, बहुतेक देशांत अधूनमधून टाळेबंदीचे वातावरण आणि जनता हवालदिल झालेली. त्या दिवशी मध्यरात्री फ्रान्समधील एका गावात एक चक्रावून टाकणारी अन् मती गुंग करणारी घटना घडली.

चाळीशीतल्या Jubillar जोडप्यातली पत्नी त्या मध्यरात्रीपासून बेपत्ता आहे. गेल्या पाच वर्षात तिचा ठावठिकाणा लागलेला नाही आणि तिचे प्रेतसुद्धा मिळालेले नाही - अगदी ‘दृश्यम’ आठवला असेल ना? मात्र पोलिसांनी त्या बाईच्या नवऱ्याला अटक करून ठेवलेली आहे आणि त्याच्यावर खुनाचा गुन्हा दाखल केलाय. तो खटला आता न्यायालयात चालू होतोय.

काय आहे तरी काय वैशिष्ट्य या प्रकरणाचे ?
बेपत्ता स्त्रीचा ५ वर्षे ठावठिकाणा नाही अन् तिचा मृतदेह आजवर मिळालेला नाही. त्या जोडप्याच्या घरात किंवा आसपास कुठेही खुनाच्या घटनेचा सबळ पुरावा सापडलेला नाही. खुनाचा कुणी प्रत्यक्ष साक्षीदार असण्याचा तर प्रश्नच नाही. बरं कुठलेही प्राणघातक हत्यार देखील त्या घरात मिळालेले नाही, ना कुठे रक्ताचे डाग किंवा डागाळलेले कपडे. मग डीएनए तपासणी तरी करणार कशाची?

दुसऱ्या बाजूला आरोपी नवरा आपण निर्दोष असल्याचे वारंवार सांगतो आहे. असे हे चक्रावून टाकणारे गूढ. एखाद्या चित्रपट दिग्दर्शकाला थरारक गुन्हेगारीपटासाठी खाद्य पुरवणारी ही घटना आहे हे मात्र नक्की. एव्हाना अशा एखाद्याने या घटनेवर आधारित चित्रपट काढायचा विचार चालू सुद्धा केला असेल.

पाहूया घटनाक्रम काय होता तो :
38 वर्षीय सेड्रिक आणि 33 वर्षीय डेल्फिन यांच्या बिघडलेल्या संसाराची ही कहाणी. तो आहे एक चित्रकार व सजावटकार आणि कॅनाबिसचा व्यसनी. तर डेल्फिन जवळच्याच एका रुग्णालयातील नर्स. दोघांचे पटत नव्हते. त्यात डेल्फिनने एका परपुरुषाशी इंटरनेटवरून मैत्री व नंतर जवळीक केलेली. परिणामी या जोडप्याची विभक्त होण्याची तयारी चालू झालेली. या जोडप्याला दोन मुले - घटनेच्या वेळी मोठे सहा वर्षांचे तर धाकटे 18 महिन्यांचे.

15 डिसेंबरच्या मध्यरात्री पासून डेल्फिन गायब असल्याची तक्रार खुद्द तिच्या नवऱ्याने पोलिसांना फोन करून सांगितलेली होती. सकाळी जेव्हा पोलीस त्याच्या घरी आले तेव्हा घरच्या साध्या कपड्यांतला हा गृहस्थ त्याच्या फोनवरील ‘गेम ऑफ थ्रोन्स’मध्ये मग्न होता.
त्यानंतर कित्येक दिवस बेपत्ता डेल्फिनचा शोध न लागल्याने पोलिसांनी तिच्या घराच्या आसपासचा प्रदेश अक्षरशः खणून काढला परंतु त्यातून प्रेत अथवा अन्य कोणताही पुरावा अजूनही मिळालेला नाही.
या प्रकरणात आतापर्यंत खुनाचा कुठलाच ठोस पुरावा न मिळाल्याने अफवा आणि कंड्यांना तर स्थानिक परिसरात उत आलाय आणि त्यातून अनेकांच्या डोक्यात भन्नाट गुप्तहेरकथा देखील शिजताहेत.

पोलिसांनी तर त्याला खुनाच्या आरोपाखाली अटक केलेली आहे. त्यांच्या दृष्टिकोनातून विचार करता -
सेड्रिकने बायकोचा खून केला आणि नंतर कणभर सुद्धा पुरावा सापडणार नाही याची तजवीज केली. आजवर पोलिसांना अज्ञात व निर्जन जागी प्रेत पुरले. त्याच रात्री घरी परतून पोलिसांना फोनवर शांतपणे बायको बेपत्ता असल्याची माहिती दिली आणि हे सगळे नाट्य घडत असताना त्या जोडप्याची दोन्ही मुले शांतपणे आपल्या खोलीत झोपलेली होती !

ज्याच्यासमोर 'दृश्यम'चा विजय साळगावकर किस झाड की पत्ती वाटावा असा हा वास्तवातील सेड्रीक. काय म्हणावे त्याच्याबद्दल ? अत्यंत बुद्धिमान गुन्हेगार, नशीबवान व्यसनी बुद्दू की गरीब बिचारा निर्दोष नवरा?
न्यायाधीशच याचा निवाडा करतील. कथालेखक यावर डोकं खाजवून छानशी गुन्हेगार कथा लिहू शकतील हे नक्की. दरम्यान खटला तर आता चालू होतोय . . .

फिर्यादी पक्षाचे मुद्दे असे असतील :
१. या नवरा बायकोचे पटत नसल्यामुळे आणि तिने परपुरुषाशी जवळीक केल्यामुळे नवऱ्याकडे खुनाचा उद्देश (motive) आहे.

२. 15 डिसेंबरच्या रात्रीनंतर दुसऱ्या दिवशी त्याच्या शरीरावर शारीरिक झटापटीच्या खुणा होत्या आणि त्याचा चष्मा फुटलेला होता. त्याच्या शेजाऱ्याने एका बाईच्या किंचाळण्याचा आवाज ऐकला होता.

३. सेड्रीकच्या भूतपूर्व प्रेयसीने पोलिसांना सांगितले की त्याने तिच्याजवळ खुनाची कबुली दिली होती आणि प्रेताबद्दलही बोलला होता.

४. या जोडप्याचा मोठा मुलगा आता ११ वर्षाचा झाला असून त्याच्या म्हणण्यानुसार त्याने आई-वडिलांची झटापट आणि धक्काबुक्की पाहिली होती. आता तो बापाकडे रागाने बघत म्हणतो आहे,
" होय, यानेच माझ्या आईला मारले".
त्यांच्याकडून १६,००० पानी आरोपपत्र आणि ६५ साक्षीदार तर तयार आहेत.
परंतु…
गेल्या पाच वर्षात प्रेत अथवा अन्य कोणताही सबळ पुरावा न मिळाल्याने बचाव पक्ष म्हणणारच की खून हे पोलिसांनी रचलेले कुभांड आहे आणि साक्षीदार खोटारडे आहेत ! मुलाची साक्ष ग्राह्य धरली तरी त्याचे महत्त्व मारहाणीच्या गुन्ह्यापर्यंत असेल.

बायकोशी पटत नसलेला व्यसनी सेड्रिक खरंच तिच्या खुनापर्यन्त मजल मारू शकतो का, या प्रश्नाभोवतीच खटला एकवटला जाईल. यातून खुनाचा परिस्थितीजन्य पुरावा समोर येऊ शकेल ?

लवकरच पाहूया, खटल्यातून काय काय ‘दृश्य’मान होतंय ते.
****************************************************************************
संदर्भ :
https://www.bbc.com/news/articles/cz69nppezlzo
आणि अन्य डिजिटल बातम्या व वृत्तान्त
चित्रसौजन्य : सरलनामा