तुमच्या विभागातील बाप्पा - २०२५

काल शुक्रवारी पावसाळी वातावरणाचा फायदा उचलत ऑफिसला सुट्टी टाकली आणि छत्री सोबत न घेता पावसात भिजत भिजत वाशीतील दोन गणपती बघून आलो.

खरे तर किमान चार ते पाच तास भटकून जास्तीत जास्त गणपती बघायचा प्लान होता. वातावरण इतके सुंदर आणि पावसाळी होते की जराही घाम अथवा थकवा येणार नव्हता. पण दुर्दैवाने ऑफिसमधून अर्जंट कामाचा कॉल आल्याने फक्त दोनच गणपती बघता आले.

१) पहिला वाशी डेपो जवळील वाईल्ड लाईफ जंगल थीम गणपतीबद्दल मायबोलीकर सामीने सुचवले होते.
अर्थात तिने मुलांसाठी म्हणून सुचवले होते. पण त्यांनी ऐनवेळी टांग दिली. तरी मी प्लान न बदलता एकटाच बघून आलो.

बाहेरचे प्रवेशद्वार पाहता खात्री पटली की आत काहीतरी वेगळे बघायला जात आहोत.

आणि आत प्रवेश करताच वेगळ्याच विश्वात आल्यासारखे वाटले. चमचमणारे कलरफुल जंगल होते. मुलांना नक्कीच आवडले असते असे वाटले.

.

काही प्राणी हलत होते. पाणी झुळझुळत होते. आणि गवताची सुद्धा सळसळ होती. त्यामुळे चलचित्र इफेक्ट आला होता.

२) दुसरा गणपती तिथलाच वाशी हायवे जवळचा पाहिला. दरवर्षी तिथे जातोच. कारण त्यांचा नेहमीच काहीतरी देखावा असतो. अश्या ठिकाणी फार गर्दी नसल्यास छान वाटते. कोणी हाकलेपर्यंत बाहेर जाऊ नये असेच वाटते. मधल्या वारी दुपारची वेळ असल्याने दोन्ही ठिकाणी ते माझ्या नशिबात होते. मुले सोबत नसल्याने दोन्ही ठिकाणी मनसोक्त फोटोच नाही तर स्टार्ट टू एंड व्हिडिओ सुद्धा काढता आले. इथे मात्र आता फोटोच देतो.

.

आणि हा आमच्या मुंबईतील घरासमोरचा,
अंजीरवाडीतील सुप्रसिद्ध गणपती.
काही वैयक्तिक कारणांनी काल रात्री जाता आले नाही आणि आज सकाळीच दर्शनाला गेलो तर ते मिरवणूक लवकर काढत असल्याने मी पोहोचायच्या आधीच मूर्ती मंडपाच्या बाहेर काढली होती.

रिकाम्या मंडपाचे फोटो काढावेत की नाही या शास्त्राबद्दल कल्पना नाही. पण मूर्तीशिवाय भव्यदिव्य मखर सुद्धा किती भकास वाटते याची प्रचिती आली.

अस्मिता, सामो, छन्दिफन्दि धन्यवाद

आणि हो, त्या सुरुवातीच्या काळात देखाव्यांच्या स्पर्धा सिरीयसली घेतल्या जायच्या. त्यात त्यांचा शो असला की दर वेळी ठराविक लोकं आत घ्यायचे. जिथे फार विशेष नसायचे तिथे देखील लोकं तासतासभर लाईन लाऊन असायचे. आज एखाद्याला प्रश्न पडावा की इतके लाईनीत जीव जाळत उभे राहावे असे त्यात काही विशेष असायचे का? पण त्या काळातली मजा त्या काळातच कळते. लोकं आवड म्हणूनच रांगेत उभे राहायचे.

असो, आजच्या अंजीरवाडी गणपती विसर्जनाच्या मिरवणुकीचे फोटो उद्या शेअर करतो. अजूनही छोटेमोठे गणपती बघणे झाले ते ही घेतो. तोपर्यंत अजून कोणी आपल्या इथल्या गणपतींचे फोटो शेअर केले तर आवडेल. स्पेशली पुणेकरांनी मनावर घेतले तर तिथले बघायला मिळतील

दरवर्षी या गणपतीवर तसेच देवीवर आमच्या बिल्डिंगमधून कल्पक पद्धतीने पुष्पवृष्टी होते. पण यंदा आदल्या दिवशीच एक अप्रिय घटना घडल्याने ते टाळले. मिरवणुकीने सुद्धा सन्मान दाखवत आमची बिल्डिंग ओलांडेपर्यंत ढोलताशे वाजवायचे थांबवले.