(π)वाट

स्पर्शरेषा जोखते जणु
वर्तुळाची वक्रता
परीघ अंशी / व्यास छेदी
(π) उरतो तत्त्वता

वर्तुळाचे केन्द्र जीवा #
ना कधीही स्पर्शिते
केंद्र गिळता तीच जीवा #
व्यास बनुनी राहते

(π) द्विगुणित होऊनी
परिघास जेव्हा भागतो
हाती ये त्रिज्या जिला
व्यासार्ध कुणी संबोधितो

वर्तुळाच्या गारुडाने
भूल कसली टाकली
तत्त्वज्ञानाची कवाडे
(π ) करितो किलकिली

परीघ, त्रिज्या दोन्हीही
परिमेय असती पण तरी
(π ) का मज वेड लावी
अपरिमेयाचे परी
~~~~~~~~~~~~~

# जीवा = chord of a circle

(π) = 3.14.....

अपरिमेय= मोजता न येणारे/ irrational