पाककृती स्पर्धा ३ : फळे वापरून तिखट-मिठाचा पदार्थ - सफरचंदाचे (ग्रीन ऍपल) लोणचे - मायबोली आय डी - आ _रती

कैरीच्या सीझनमध्ये झटपट कैरीचे लोणचे तर आपण नेहमीच बनवत असतो . पण कैऱ्या नसतील तेव्हा मी हे इन्स्टंट ग्रीन अ‍ॅपल लोणचे बनवते. अगदी १० मिनिटात बनते. पोळीबरोबर किंवा नुसतेच खायला मस्त. स्पर्धेसाठी हा विषय आला तेव्हा पहिल्यांदा हेच लोणचे आठवले. बरेच जण करतही असतील.
टीप : ग्रॅनी स्मिथ किंवा हिरवे सफरचंदच घ्यावे . ते चवीला आंबटगोड असल्याने लोणच्याला मस्त चव येते.

साहित्य :
२ ग्रॅनी स्मिथ सफरचंद,
चिमूटभर हिंग, मीठ , आवडीनुसार लाल तिखट, काश्मिरी लाल तिखटही थोडेसे टाकल्यास लोणच्याला मस्त रंग येतो. नसल्यास काही फरक पडत नाही .
एका सफरचंदासाठी १ /४ टीस्पून भाजलेली मेथी पावडर. त्याने छान चव येते .
फोडणीसाठी - तेल, मोहरी, हिंग

कृती :
कसलेही डाग नसलेले दोन हिरवे सफरचंद (ग्रॅनी स्मिथ ) धुवून पुसून घ्या. त्याचे चार भाग करा आणि बिया काढून छान एकसारखे लहान तुकडे करा.

चिरलेली सफरचंद एका भांड्यात ठेवा. त्यात लाल तिखट, भाजलेली मेथी पावडर, हिंग आणि मीठ घाला.

मिक्स करा

तेल, मोहरी, हिंगाची फोडणी करून थंड झाल्यावर सफरचंदांवर असलेल्या मसाल्यांवर टाका .सर्व मिक्स करा. झटपट लोणचे तयार. मुरण्याची वाट पाहायची गरज नाही.