मसुर पुलाव

'मसुर पुलाव' साठी लागणार्‍या भाज्यांची कापाकापी करुन बाकीचे मसाले आणि जिन्नस पटकन हाताला उपलब्ध होतील अशी तयारी करुन घ्यावी.

नॅानस्टीक कुकर अथवा पॅन मधे मध्यम आचेवर साजुक तुप तापवून त्यात अर्ध्या रिंग्जच्या आकारात कापलेला कांदा गुलाबी रंग येईपर्यंत परतल्यावर त्यात लवंगा, वेलची, तमालपत्र, दालचीनी, कडीपत्ता आणि काजु घालुन चार-पाच मिनीटे परतावे.

कांद्याचा रंग गोल्डन ब्राउन झाल्यावर त्यात आधी रिंग्जच्या आकारात कापून पुन्हा चार भागात कापलेला टोमॅटो, आले लसुण पेस्ट, उभी चीर दिलेल्या हिरव्या मिरच्या, गाजराचे तुकडे आणि फ्लॅावर घालुन दोनेक मिनीटे सतत ढवळावे.

त्यानंतर थोड्या मोठ्या फोडी कापलेला बटाटा, गरम मसाला, तीन ते चार तास भिजवून ठेवल्यावर अर्ध्या वाटीचा फुगुन एक वाटी झालेला अख्खा मसुर आणि धने-बडीशोप पुड घालुन दोन-तीन मिनीटे परतल्यावर त्यात चार वाट्या पाणी आणि चवीनुसार मीठ घालावे.

मिश्रणाला चांगली उकळी फुटल्यावर त्यात धुतलेला बासमती तांदुळ घालुन गॅसची आच मोठी करून मिनीटभर ढवळावे.

पाच मिनीटे मोठ्या आचेवर (न ढवळतां) शिजवल्यावर पुन्हा गॅसची आच मध्यम करावी. दम लावण्यासाठी चांगल्या जाड ताटाच्या सपाट बाजुला वर्तमान पत्राचा कागद पाणी लाऊन व्यवस्थीत चीकटवुन झाकण म्हणुन कुकर/पॅनवर ठेउन त्यावर लोखंडी खलबत्ता, वरवंटा पैकी काही नसल्यास सरळ दोन-तीन दगड वजन म्हणुन ठेवावे. (आमच्याकडे बिना शिट्टीचा नॅानस्टीक कुकर असल्याने कागद आणि वजन वापरावे लागले नाही)

बारा ते पंधरा मिनीटांनी गॅस बंद करून पुढे पाच-सात मिनीटे वाफ मुरू द्यावी. शेजारी भोचक असतील तर पुलाव तयार होत असताना दरवळणार्‍या त्याच्या सुगंधामुळे तुमच्या घरात काय शिजतय याची विचारणा करायला नक्की येणार ह्याची खात्री बाळगा.

तयार झालेला स्वादिष्ट मसुर पुलाव भाजलेले उडदाचे पापड आणि स्लाईस्ड कांदा टोमॅटो बरोबर (आवडत असल्यास थोडीशी कोथिंबीर भुरभुरुन) सर्व्ह करावा. पापडांच्या जोडीला कांदा, टोमॅटो, हिरवी मिरचीची दह्यातली कोशिंबीर असल्यास सोने पे सुहागा!