रिचार्ज

Submitted by जाई. on 14 May, 2025 - 09:31

आणि मग एके क्षणी मेंदूने तसेच डोळ्यांनीही शिणवटा आल्याचा निर्वाणीचा इशारा द्यावा . स्क्रीनवरच्या घड्याळ्याकडे पाहून चॅक आवाज काढत आवाराआवर करावी. 24 अवर्स सेन्टरलाईज्ड एसी ऑफिसच्या लिफ्टमध्ये शिरावं. मध्येच भेटलेल्या ऑफिसबडीजच्या " ओ ! लिटिल अर्ली लिव्हिंग टुडे ? " खोचक प्रश्नाला हॅ हॅ हॅ करत " सडनली , आय चेंज माय प्लॅन टू होम टुडे " असं कूल (!) उत्तर द्यावं. लोकलच्या प्लॅटफॉर्मवर पोचताच शिंग फुंकले रणी पवित्रा घ्यावा आणि तितक्याच उत्साहाने सज्ज होऊन लोकलमध्ये घुसावं. त्या झटापटीत आपल्या पायावर भरभक्क्म पाय पडलेला असतो त्यामुळे पाय हुळहुळत असतो , आपला धक्का इतरांना लागलेला असतो, बॅकग्राउंडला तू तू मैं मैं संगीत वाजत असत . तर या सगळ्याकडे सवयीच्या निर्ढावल्याप्रमाणे (!) दुर्लक्ष करावं. मग आपलं स्टेशन येताच आपसूक उतरलं जाण्याची खात्री करून घेऊन उतरावं.
स्टेशन येताच आज रिक्षा करावी कि चालत जावं या द्विधा मनस्थितीत सापडण्याच्या शक्यतेच्या आत काल परवाच झालेलं हेल्थ सेमिनार आठवावं आणि त्यातल यू मस्ट वॉक अटलिस्ट फॉर 45 मिनिट्स चा बुलेट स्मरणात येऊन पायी हळू हळू चालाची वाट पकडावी. चला थोडाफार तरी व्यायाम होतोय या कल्पनेने खुश व्हावं. घर ते स्टेशन या 15 मिनिटात सगळे विचार अनविंड करायचा प्रयत्न करावा पण सकाळपासूनचा स्ट्रेस घेत चालत राहावं .

सोसायटी येताच आपलं बॅडलक आज खूप खराब आहे हे पक्के केल्यासारखी लिफ्ट आपण बटन दाबायच्या आता टॉप फ्लोर दिशेने धावत सुटलेली असते . अश्या वेळी चरफडण या प्रतिक्षिप्त क्रियेने आधीच असलेल्या ताणात भर पडण्याची शक्यता लक्षात घेऊन कुठल्यातरी ऑनलाइन पोर्टलवर वाचलेल्या आर्टिकल मधले 1, 2, 3,4 असे आकडे मोजावेत. शक्यतो चेहरा हसरा ठेवावा आणि घरी पोचाव .

मग सेफ्टी डोअर वर अक्षरशः रेलून बेल वाजवावी. दिवसभराच्या साचलेल्या ताणाच थोडा अंश हाताकडे परिवहन झाल्याने बेलचा आवाज अंमळ थोडा जास्त होतो. त्याबद्दल दोन शब्द ऐकायचीही तयारी ठेवावी.

दरवाजा उघडल्यावर थकलेल्या दिवसाचं रिचार्ज आपली वाट पाहत असत. दारातून आत येऊन चप्पल काढत असतानाच समोरून हैय्या असा मोठा आवाज येतो तो चेहऱ्यावरील बोळक्या हास्यासकट.. आपल स्वतःच मिनी व्हर्जन आपली वाट बघत असत. त्या चिमुकल्या मोठ्या डोळ्यात आई आलीये असे जिंकण्याचे हसरे भाव असतात.

मग आपलेही ओठ हसू लागतात, दमलेले डोळे फ्रेश होतात , आणि हात त्या पिलाचा पापा घ्यायला सरसावतात…सकाळपासूनचा ताण एका क्षणात विसरल्याच फिलिंग मग आपसूक येऊन जातं.

सुख म्हणजे नेमकं तरी दुसरं काय असत !!!

विषय: 
नातीगोती
प्रवास
शब्दखुणा: 
प्रवास
नाती
स्फूट
ललित
Groups audience: 
गुलमोहर - ललितलेखन
Group content visibility: 
Public - accessible to all site users
शेअर करा

गोड!
सगळं वर्णन चित्रदर्शी आहे.

Submitted by भरत. on 14 May, 2025 - 09:46

सुंदर!l
फारच रिलेट होणारे..
एक जग जिथे आपण चांगले काम करतो तेवढ्यापुरते लोकांना आवडतो तिथून निघून एक जग जिथल्या लोकांना आपण कसेही असले तरी आवडतोच तिथे परत येणे हा दर दिवशी मिळणाऱ्या सुखाचा परमोच्च बिंदू असतो.

दुःखाची झळ लागल्याशिवाय सुखाची किंमत कळत नाही असे म्हणतात..
जेव्हा ऑफिसमध्ये काम आणि स्ट्रेस वाढते तेव्हा मनात हाच विचार करतो की आज हे काम निपटवून घरी पोहोचेल तेव्हा या भेटीतील आनंद सुद्धा तितकाच वाढलेला असेल Happy

Submitted by ऋन्मेऽऽष on 14 May, 2025 - 13:01

किती सुंदर लिहिलं आहेस जाई.
आई घरी आल्यावर होणारा आनंद हल्ली मी रोज बघते आहे. आई दिसल्यावर होणारा नातवाचा आनंद बघणे हा दिवसातला माझा सर्वात बेस्ट क्षण असतो त्यामुळे मी तो कधी ही मिस करत नाही. हल्ली तो जरा मोठा झाल्या कारणानें बेल वाजली की दारामागे लपून भॉक करायचं असतं आईला रोज.

Submitted by मनीमोहोर on 14 May, 2025 - 15:24

ममोताई , यू आर ब्लेस्ड !>> अग ते आत्ता, पण आत्ता तरी हा आनंद बघायला मिळतोय हे काय कमी आहे ?
माझ्या मुलांच्या वेळी तुझी माझी सेम परिस्थिती होती. असो.

Submitted by मनीमोहोर on 15 May, 2025 - 02:35

एक जग जिथे आपण चांगले काम करतो तेवढ्यापुरते लोकांना आवडतो तिथून निघून एक जग जिथल्या लोकांना आपण कसेही असले तरी आवडतोच तिथे परत येणे हा दर दिवशी मिळणाऱ्या सुखाचा परमोच्च बिंदू असतो.>> ऋन्मे$ष, फारच छान विचार.
लेख रिलेट करता आला. खरंच छान अनुभव असतो असं इवलं स्वागत म्हणजे.

Submitted by प्राचीन on 17 May, 2025 - 00:45

Pages