पाऊले चालती भाजपाची वाट

पाऊले चालती भाजपाची वाट
काल पासून सततच्या नोटिफिकेशन्स मुळे मोबाईल मधे नोटिफिकेशन सेटींग्ज बंद करून टाकले.

मविआच्या मित्रांच्या पोस्ट्स आहेत ज्यात भाजपाने अशोक चव्हाण भ्रष्टाचारी असल्याचे २०१९ ला म्हटले होते. तर भाजपाकडून अशोक चव्हाण हे कसे कर्तबगार आहेत असे म्हटलेले आहे.

राजकारणाचा स्तर इतका खालावलेला आहे कि आपण काही काळापूर्वी काय भूमिका घेत होतो याचे भान दोन्हीकडच्यांना नाही. जर मविआला अशोक चव्हाण भ्रष्टाचारी असल्याचा साक्षात्कार काल झाला असेल तर इतके दिवस त्यांना पक्षात का ठेवले होते ? आणि भाजपाला जर काल अशोक चव्हाण हे भ्रष्टाचारी होते हे माहिती होते तर आज त्यांना पक्षात कसे काय घेतले ?

अशोक चव्हाण हे एक नाव झाले.
काल त्या जागी राधाकृष्ण विखे पाटील होते, अजितदादा पवार होते, मुख्यमंत्री शिंदे होते आणि असे शेकडो लोक होते.
दोन्हीकडच्या ठरलेल्या प्रतिक्रिया वाचूनही उबग आलेला आहे.

मविआचे लोक म्हणतात "आता ते भाजपाच्या वॉशिंग मशीनमधून स्वच्छ होणार".
भाजपचे लोक म्हणणार " तुम्हाला आज समजले का ते भ्रष्ट होते ?"

किती दिवस या उपहासाला, ब्लॅक ह्युमरला दाद द्यायची ? असे भ्रष्ट नेते पक्षात ठेवून काय लढाई लढायची ?
काँग्रेसचे एक दरबारी नेते आहेत जे स्वतःच्या बळावर निवडून येऊ शकत नाहीत, पण मुख्यमंत्री होते. ते पक्षावर नाराज आहेत. खरे तर त्यांची निवडून येण्याची क्षमता नसल्याने भाजप त्यांना पक्षात घेत नाही. पक्षात राहूनच ते भाजपला अनुकूल कारवाया करत आहेत. माढा आणि अन्य काही मतदारसंघात त्यांनी काँग्रेसच्या विरोधात काम केले. त्यांच्या जवळच्या लोकांना भाजपने तिकीट दिले होते. दोन जण भाजपच्या तिकीटावर निवडून आले.

जयंत पाटील , विश्वजित कदम आणि बंटी पाटील हे भाजपच्या संजयकाका पाटलांसाठी भिडेंच्या सांगण्यावरून फिल्डींग लावतात.
हे लोक निव्वळ इडीमुळेच असे करतात असे काहीही नाही.

यांची संस्थाने आहेत. या संस्थानात दुसरा कुणी मोठा होऊ नये एव्हढीच या माऊलींची इच्छा असते. आर आर पाटलांचे महत्व वाढू लागल्यावर जयंत पाटील अस्वस्थ व्हायचे. आर आर यांना पाडण्यासाठी विजयसिंग मोहिते पाटील ( आता भाजपमधे) आणि जयंत पाटील हे संजय काका पाटलांना विधानसभेला मदत करायचे. एकदा आर आर हे पराभूत होणार असे वाटत असताना थोडक्यात निवडून आले. त्या नंतर संजयपाट्का पाटील लोकसभेला उभे राहू लागले. गेल्या खेपेला निवडून आले.

संस्थानिकांना जिल्हा पण पहावा लागतो. हे सांगली ,कोल्हापूर भागात वर्चस्व ठेवू पाहतात. पण इथे वसंतदादा पाटलांना मानणारा मतदार आजही आहे. वसंतदादा पाटलांच्या घराण्याला नेस्तनाबूत केल्याशिवाय या मंडळींचे वर्चस्व राहणार नाही. यामुळेच पूर्वी पतंगराव कदम भिडेंना मदत करत. आता त्यांचे पुत्र विश्वजीत कदम, जयंत पाटील आणि अन्य काही नेते भिडेंच्या संघटनेला मदत करतात. या संघटनेच्या मदतीने पाडापाडी चालते, याचा फायदा पूर्वी सेना भाजपला व्हायचा. या मंडळींच्या कारवाया पाहून निवेदिता माने राष्ट्रवादी कडून उभे रहायचे कि सेनेकडून याचा निर्णय घेत. आता त्या ही भाजपसोबत आहेत.

भाजपची स्वतःची ताकद कमी आहे. पण संस्थानिकांच्या या राज़कारणाने भाजपा आज महाराष्ट्रात शक्तिशाली वाटतेय. तशी ती नाही.
भाजपा विदर्भात सुद्धा काही काळापूर्वी दुबळीच होती. तिथे काँग्रेस राष्ट्रवादीच्या जातीच्या राजकारणामुळे ओबीसी भाजपाकडे गेला. काही वर्षांपूर्वी याच पाडापाडीच्या राजकारणामुळे विदर्भात भाजपाला मदत झाली. आज तिथे ओबीसींना भाजपा निवडून येणारा पक्ष वाढतो. काँग्रेसच्या एकजातीय वर्चस्ववादाला उत्तर म्हणून त्यांनी भाजपला जवळ केले.

ज्यांना धर्मनिरपेक्षता, हिंदुत्ववाद, राष्ट्रवाद,पुरोगामित्व यासाठी या दोन्ही बाजू लढतात असे वाटते ते वेगळ्या नंदनवनात राहतात.
एखादा राजकीय कार्यकर्ता जरी तुमच्या संपर्कात असेल तर तुम्हाला हे उघडे नागडे राजकारण कळून येईल. विचारधारेचा आणि या मंडळींचा दूरान्वयेही संबंध नाही. निवडणुकांना सामोरे जाण्यासाठी एक बाजू सातत्याने फुले - शाहू - आंबेडकर या नावांचा जप करते. दुसरी बाजू सावरकर- बाळासाहेब ठाकरे - अटलबिहारी वाजपेयी असा जप करते.

किमान मूळचे भाजपायी विचारांसाठी तरी लढत आहेत. त्यांच्या दृष्टीने हे इनकमिंग पक्षवाढीसाठी उपयुक्त आहेत. एकदा का समोरचू बाजू संपली कि मग आपले हार्डकोअर कार्यकर्ते निवडून येतील. हा त्यांचा मनसुबा आहे.

हा मनसुबा माहिती असूनही विरोधी खेमा काहीही काळजी घेत नाही. कारण काळजी घेण्यासारखे काहीच हातात नाही. एकेकाळी निवडून येणे या एकमेव निकषावर नको ते लोक पक्षात घेतले होते. आज त्यांच्या कलाने प़क्ष चालतो. त्यांच्यावर कारवाई करण्यासारखे धैर्य या पक्षात कधीही नव्हते.

आदर्श घोटाळा झाला होता हे आज चव्हाण भाजपात गेल्यावर का होईना काँग्रेस मान्य करतेय. सत्तर हजार कोटींचा घोटाळा झाला हे सुप्रिया सुळे आज मान्य करताहेत. ते भाजपावर टीकेच्या निमित्ताने हे मान्य करत आहेत कि इतके दिवस आम्ही या भ्रष्टाचारावर गप्प बसलो होतो.

मतदारांना काहीही अक्कल नाही हा या राजकारण्याचा समज आहे कि खरंच मतदार त्याच पात्रतेचा आहे हे कळायला मार्ग नाही. मतदार सुद्धा चटकन बाजू बदलत असेल तर अवघड आहे. या नेत्यांना दोन्हीकडचा मतदार जाब कधी विचारणार ?

सात्विक सोज्वळ संघी मतदार भ्रष्ट नेत्यांच्या आयातीबद्दल फडणवीस मोदी शहा यांना का खडसावून विचारत नाही.
मविआ चा मतदार एव्हढा पैसा यांनी खाल्ला असेल तर मग आमच्या दुर्दशेचे कारण तुम्हीच आहात हे का विचारत नाही ?

या परिस्थितीत कुणीही निवडून आला तरी मतदारांच्या कल्याणाचे कोण बघणार आहे ?
सध्या कायदा आणि सुव्यवस्थेचे तीन तेरा वाजलेले आहेत. एकेकाळी भय भूक भ्रष्टाचार या पासून मुक्ती ही आपली टॅगलाईन होती हे भाजपाला कोण आठवण करून देईल ?

( धाग्यावर गोंधळ झाला तर फक्त प्रतिक्रिया उडवल्या जाव्यात. धागा बंद करू नये ही विनंती)