मी धामापूर तलाव बोलतोय ....

प्रबुद्ध जनहो ,
ही जाहिरात नाही अथवा कोणताही प्रचार नाही . हा मी तुमच्याशी केलेला संवाद आहे. हा तुमच्याशी -माझ्या भावंडांशी , हो तुम्हीच ! मी तुम्हाला घातलेली एक अंतर्साद आहे. मी कोण ओळखलंत ?? सभोवताली घनदाट जंगल , डोंगर ,जैवविविधतेने नटलेला आणि समोर पवित्र भगवती देवीचे मंदिर लाभलेला मी धामापूर तलाव बोलतोय . १२५ एकर क्षेत्रफळ व्यापून ,बारमाही तुडुंब पाण्याने भरून असलेला मी धामापूचा तलाव . काळसे -धामापूरवासियांचा जीव कि प्राण. मी माझ्या अद्भुत सौंदर्याने मनुष्यालाच नव्हे तर पशुपक्ष्यानाही मोहित करतो. नुसते मोहीतच नाही, तर मी या सजीवांना माझ्या कुशीत आसाराही देतो. माझे शांत स्वरूप सर्वांच्या मनाला प्रसन्नतेची झुळूक देऊन जाते . निरनिराळे पशु पक्षी ,झाडे ,वनस्पती यांचा सहवास मला लाभल्याने मी निसर्गसंपत्तीचा समृद्ध खजिनचाच आहे. डार्टर ,लेसर विसलिंग डक्स ,ब्रॉन्झ विंग जकाना ,हॉर्नबिल सारखे पक्षी माझे सोबती आहेत . माझ्यासोबत काही महिने वास्तव्य करायला परदेशातूनही काही पक्षी आपल्या लवाजम्यासह येतात. आश्विन आणि कार्तिक या मासांत मला भेट द्यायला युरोपवरून युरेशियन मार्श हिरियार हा पक्षी येतो. मिमिसिलोन रंदेरियाना ,नॉथोपेजिया कास्टनेफोलिया ,क्लॉटलरिया फिलिपस बेंथ यासारख्या नामशेष होणाऱ्या वनस्पतींच्या प्रजाती माझ्या किनाऱ्यावर आढळून येतात . ब्लु मॉर्मन ,तामिळ लेसविंग,क्लिपर यासारखी फुलपाखरे माझ्या किनाऱ्यावर आनंदाने बागडतात. अलीकडे धोक्यात असणाऱ्या पाणमांजरींच्या प्रजाती माझ्या कुशीत वास्तव्य करतात . माझे पाणी तीर्थासारखे पवित्र मानतात. यासारखी अद्भुत निसर्ग संपत्ती जन्मतःच लाभल्याने मी स्वतःला अतिशय भाग्यशाली समजतो.
माझा जन्म १५३० साली झाला. मी एक शिवकालीनपूर्व तलाव आहे. जगविख्यात कीर्तिवंत अशा ताजमहलहून मी ८० वर्षांनी मोठा आहे.
गावातील लोकांच्या अथक परिश्रमाने मी साकारला गेलो. माझ्या या मनमुग्ध करणाऱ्या सौंदर्याचे श्रेय त्याच श्रमिकांना जाते ,ज्यांनी आपल्या कष्टाने मला उभारले. डोळ्यांना दिपवून टाकणारे माझे हे सौंदर्य आज त्यांच्या श्रमाचे व बुद्धीमत्तेचे प्रतीक आहे. माझी रचना भौगोलिक दृष्टीने अत्यंत विचारपूर्वक केलेली आहे. गाव समाज खाली व माझे स्थान वरती आहे . जेणेकरून माझे पाणी गावकऱ्यांना कोणतेही विद्युत उपकरणे न लागता अगदी सहजपणे पोचू शकेल. माझे स्वच्छ आणि निर्मळ पाणी कालव्यांद्वारे अनेक गावांस पुरविले जाते. पाण्यासारखी बहुमोल गोष्ट मी देत असल्याने या गावांत मी महत्वाची भूमिका बजावतो . माझ्यावर अनेक दंतकथा लिहिल्या गेल्या. एका दंतकथेनुसार मी पूर्वी लग्न अथवा शुभ कार्यांसाठी परडीभर फुलांच्या बदल्यात सोने देत होतो. या दंतकथेचा उल्लेख गॅझेटियर बॉंबे प्रेसिडेन्सी खंड-१० मध्ये आहे. मी स्वतःला अतिशय सुखी आणि भाग्यवान तलाव समजतो.
ज्या लोकांनी मला घडवण्यासाठी घाम गाळला,निसर्गाने मला हे अद्भुत सौंदर्य देऊन अलंकारीत केले ,या सर्वांचा मी अत्यंत ऋणी आहे. मी तुम्हाला देत असलेला हा अनमोल ठेवा काळाच्या ओघात लुप्त होऊ देऊ नका . माझी काळजी घ्या . माझे रक्षण करा आणि आपल्याला भरभरून देत असलेल्या या निसर्गाचा मान ठेवा ..
तुमचा धामापूर तलाव .