गोवन सेरादुरा ( Goan serradura )

नवीन वर्षाच्या स्वागताला काहीतरी नवीन करायचं होतं.. ही रेसिपी बरेच दिवस करायची होती म्हणुन काल मुहुर्त साधला.
इथे पुण्यात एका अस्सल गोवन फिश थाळी देणार्‍या हॉटेलात पहिल्यांदा खाल्ली आणि फार आवडली होती. मस्त चटकदार फिश करी खाल्ली की ही रेशमी पोताची सेरादुरा खायलाच हवी..

कृती खरंच...एकदम सोप्पी.....

१. मारी बिस्किटाचा चुरा करुन त्यात पातळ केलेलं बटर मिसळून घ्या.. ज्या भांड्यात सेट करायचे त्याच्या तळाशी या चुर्याचा एक थर द्या आणि चमच्याने दाबुन घ्या. शक्य असेल तर थोडावेळ फ्रीज मधे सेट करायला ठेवा.
२. व्हिपींग क्रीम एका उभंट पातेल्यात इलेक्ट्रीक बीटर ने फेटुन घ्या.. सॉफ्ट पीक्स आले पाहिजेत...
३. नंतर त्यात मिल्कमेड्/मिठाई मेट, वॅनिला इसेंन्स घालुन घ्या आणी अलगद मिक्स करा.. काही रेसिपी मधे या स्टेप नंतर फेटु नका असे सांगितले होते पण आम्हाला जरा पातळ झाल्यासारखे वाटले सो परत फेटले आम्ही....मस्त रेशमी पोत आला असेल.. गोडवा बघा, कमी वाटला तर एखादा चमचा पिठीसाखर घालु शकता. पण हे जरा अगोड च असतं..
४. आता काचेचा बाउल, किंवा थेट सर्विंग बाउल मधे अर्ध्यापर्यंत फेटलेलं मिश्रण भरा.. मग परत मारी चा चुरा टाका.. वरती परत क्रीम चा लेयर. एकाच मोठ्या काचेच्या बाउल मधे हे सेट केलं तरी चालेल. मी लहान सर्विंग बाउल वापरले.
५. आता ३-४ तास फ्रीज मधे ( फ्रीजर नाही ) सेट करायला ठेवुन द्या.

कोणत्याही तिखटाच्या जेवणावर हे जन्नत लागतं.. रेशमी पोत अक्षरशः तोंडात विरघळतो...