भारत का दिल देखो (पाककृती) - भरडा का कलेवा - इन्स्टंट प्रकार

'भारत का दिल देखो' या (माझ्या मध्यभारतातील लोकजीवनावर आधारित) मालिकेत एक पारंपरिक पदार्थ नव्या इन्स्टंट रूपात.
ज्वारी / बाजरी / नाचणी हि धान्ये आपल्या परंपरांगत अन्नाचा भाग आहे. आजही ग्रामीण भागांत लोक ह्या रोजच्या आहारात या भरडधान्यांचा वापर करतात.
विदर्भ आणि त्याला लागून असलेल्या मध्यप्रदेशातील भागांत बनणार एक अतिशय साधा व रुचकर नाश्त्याचा प्रकार. दलिया / आंबिल इत्यादीचा भाऊबंद म्हणता येईल.

भरडा म्हणजे कोणतीही भरड धान्ये आणि कलेवा म्हणजे हलकी फुलकी न्याहारी. मूळ पाककृतीनुसार धान्ये २-३ दिवस भिजत घालायची असतात. पण आज मी झटपट पद्धत सांगते. (मी ज्वारीचा केला तोच येथे देते आहे. )
तर
एका भांड्यात २ वाट्या ज्वारी घेऊन त्यात पाणी घालून प्रेशर कुकर मध्ये २ शिट्या करून घ्या.अगदी भात करतो तसंच.
शिजून थंड झाल्यावर त्यात थोडं मीठ घालून मिक्सर मधून भरड वाटून घ्या.

खलबत्यात ४-५ पाकळ्या लसूण, जिरे, मिरे आणि ओवा कुटून घ्या. एकदम बारीक नको. जरासंच ठेचायच आहे.

आता एका पातेल्यात तूप गरम करून त्यात जिरे तडतडून घ्या. त्यात सुक्या लाल मिरच्या, हिंग आणि कढीपत्ता आणि लसणाचं वाटण घालून खमंग फोडणी करून घ्या.
यात ज्वारीची भरड घालून दोन मिनिटे परतून घ्या. आता पातळ केलेले दही / ताक आणि चवीनुसार मीठ घालून उकळी येऊ द्या. गरज वाटल्यास थोडे पाणी घाला. लापशी इतके पातळसर शिजवायचे. झाकण ठेवून ५ मिनिटे शिजू द्या. (सर्व प्रोसेस पातेल्याऐवजी लहान कुकरमध्ये (एक शिट्टी देऊन) केल्यास फारच कमी वेळात होते.

चमचाभर तूप घालून गरम गरम गट्ट करा. आवडत असल्यास वरून लिंबू पिळून घ्या.