सातच्या आत घरात

आज घरात वातावरण तंग होतं.

"पण तुम्हाला रात्रीच पार्टी करायची काय गरज आहे? दिवसभर तर सोबतच असता कॉलेज मध्ये. दिवसा करा ना पार्टी."
"अहो पण बर्थडे केक तर रात्री १२ वाजताच कापणार ना? कि तो पण सकाळी कापायचा?"
"हे बघ, मी तुला मित्र मैत्रिणींसोबत जाऊ नकोस, असं नाही म्हणत आहे. पण अंधार व्हायच्या आत घरात ये, इतकंच म्हणतोय."
"पण बाबा, माझ्या सोबत सगळेच असणारे. मी काय एकटी थोडीच येणार रात्री वापस. समीर, संकेत दोघंही घरी पोचवणारेत आम्हा मुलींना."
"एकदा नाही म्हटलंय तुला. परत तेच ते बोलून माझं उत्तर बदलणार नाहीये."
"बाबा प्लिजSSS मग मी तुम्हाला फोन करते, तुम्ही घ्यायला या. "
"ए ,उद्या मला सकाळी उठून ऑफिसला जायचंय. तुमच्यासारखं १० वाजेपर्यंत लोळत नाही पडायचंय सकाळी. रात्री १ वाजता मी अजिबात उठून येणार नाही."
"तुम्ही माझं काहीच ऐकत नाही .... "
"असं करा ना, दिवसभर मस्त पिकनिकला जाऊन या जवळपास कुठे. म्हणजे मस्त तुम्हाला सगळ्यांना एन्जॉय करता येईल. बर्थ "डे" मनवा. "
"You are impossible"
.
.
.
.
.
"अहो पण आता रात्रीचं जायला काही अडलंय का?"
"अगं, सिटी लाईट्स शो रात्री नाही पाहणार तर काय दिवसा पाहू का?"
"हे बघा, तुम्हाला दोघांना फिरायला जायचंय सिटीमध्ये तर जा. तुम्हाला तुमचं बसनी पण जाऊ द्यायला तयार आहे मी. पण अंधार व्हायच्या आत घरी या."
"आम्हाला काय आमचं फिरता नाही येत का? कितवी खेप आहे हि आमची इथली?"
"मी कुठे नाही म्हणतेय. जा ना तुम्ही.. मी तुम्हाला सगळं बुक करून देते. आणि सबवेचा मॅप पण देते. जायला माझी मुळीच हरकत नाहीये. पण तो संध्याकाळचा टूर नाही म्हणतेय फक्त. रात्री घरी यायला ११ वाजून जातील. वीकडे मध्ये इतक्या उशिरा कोणी नसतंय बाहेर. उगाच कशाला रिस्क घ्यायची?"
"बरं, मग आमचा टूर संपला कि तुम्हाला फोन करतो. तुम्ही या घ्यायला. मग तर झालं?"
"ह्या, सकाळी ८ वाजता मीटिंग आहे माझी. याला तर खूपच लवकर उठावं लागतं, माहित आहे ना तुम्हाला. इतक्या उशिरा आम्ही नाही येणार घ्यायला. त्यापेक्षा वीकएंडला जाऊ या ना सगळेच सोबत."

आज परत घरात वातावरण तंग होतं.