नीळभुली
निळी नीज निळी जाग
श्वासांश्वासां निळा गंध
खोलू जाता निळी दिठी
निळ्याईची अंदाधुंद
निळीझार ओढणी नि,
निळ्या बिंदीचे तोरण
निळ्या अल्लड तोरड्या,
निळ्या लाजेचे कंकण
निळी गाज निळा साज
निळा पावा निळी साद
निळा नितळ आवाज
निळे निळे पडसाद
निळ्या पाउलवाटेला
कुरवाळी निळी चाल
निळ्या चालीत गुंतले
निळे सूर, निळा ताल
निळ्या वाटेला लागली
निळीसावळी चाहूल
निळ्या कदम्बाला पडे
निळ्या डोहाचीच भूल
निळी काया निळी छाया
निळावले अंग अंग
ब्रम्ह, माया अन जीव
नव्या निळाईत दंग
निळे अर्घ्य निळ्या जळी
निळा चंद्र डहुळला
गोर्या राधेच्या बाधेने
निळकांत झळाळला
-शलाका.
|
